Beirut Explosion-Nurse saving 3 babies-2020, August 4-by Zarmine Boghosian

 

ՀՐԵՇՏԱԿԱՅԻՆ ԱԶԱՏԱՐԱՐ ԲԱԶՈՒԿՆԵՐ

          Remembering August 4, 2020-explosion in Beirut Lebanon

                         Գրեց՝ Զարմինէ Գ․ Պօղոսեան

 

Մութը ետիդ թողած լոյսին բերիր,

Ով նուիրեալ հոգատար աղջի՛կ,

Անանուն, բարեգութ, ազնիւ հոգի.

Հիւանդապահուհիի վկայականդ չէր

Որ քեզ մղեց ազատարարն ըլլալու

Երեք նորածին՝ ԱՅՈ՛,

Նորածի՛ն

Հոգիներուն այս մանրիկ ու նորածին

Նոր աշխարհ եկած՝ երեք անմեղ

Թեւերուդ մէջ գրկած ապահով

Հասցուցիր լոյսի՛ն,

Խնայեցիր որ անոնք մնան անտես

Ետիդ մնացած գեհենին,

Կուրծքիդ սեղմեցիր, լոյսի՛ն բերիր

Փաստելու, յայտարարելու

Աշխարհին ի լուր թէ անոնք

Կ’ԱՊՐԻ՛Ն

Երեք նորածին, երեք փափուկ մարմին,

Երեք զոյգ աչք եւ ականջ

Աշխարհ չտեսած՝ խլացա՛ն անոնք

Ահաւոր պայթիւնէն անմարդկային

Մարդ արարածին գեհենային քայլով,

Արհաւիրք սփռող արարքով,

Քանդելո՛ւ միտումով...

Երե՛ք ՀՈԳԻ, եւ նորածի՛ն

–        Չհասցուցին տեսնել թէ

–        Ինչե՜ր կը կատարուին իրենց ետին,

Նո՛յն սենեակին մէջ ուր աչք բացին..

Երեք նորածին

–        ՀԱՒԱՏՔ, ՅՈՅՍ ու ՍԷՐ

Ներարկելու աշխարհին

Ազատարար հրեշտակին թեւերուն մէջ,

Երեք նորածին՝ շնորհուած այս կեանքով,

Երեք պատգամ ունին տալիք աշխարհին,

Անգութ ու խուլ այս աշխարհին,

ՀԱՒԱՏՔ, ՅՈՅՍ ու ՍԷՐ

Մէ՞կը՝ Ապրելու կամքն ու իրաւունքը մարդկային

ՀԱՒԱ՛ՏՔԸ

–        Որ ոչ ո՛ք իրաւունք ունի խլելու

–        Երկրորդը ՅՈՅՍՆ է՝

վերացնելու ԱԹՈՌՆԵՐԸ աննպատակ,

Ոչնչացնելու բոլոր գամերը ամրապնդող,

ԵՐՐՈՐԴԸ՞՝

Աշխարհին ընծայել ՍԷՐ

ու միմիայն ՍԷՐ,

Սահմանազանց ծառայողներ եւ անձնուրաց,

Փայփայող, հոգատար բազուկներ ամենուրեք,

Ապրելո՛ւ, ապրեցնելո՛ւ իրաւունքին հաւատացողներ,

Հրեշտակային ազատարարներ,

ԿԵԱ՛ՆՔ ապահովող հոգիներ:

7 Օգոստոս, 2020- Springfield- PA

 

PS: Hero nurse saves THREE NEWBORNS from devastating Beirut blast – August 4, 2020- Tuesday’s explosion killed at least 135 people, injured more than 5,000 others and damaged up to 300,000 homes in Lebanon’s capital.